‘तिहार फ्लोरा एक्स्पो–२०८१’ सुरु

काठमाडौं । नर्सरी व्यवसायी संघ नेपालको आयोजनामा पाँच दिने तिहार फ्लोरा एक्स्पो–२०८१ सुरु भएको छ । आजदेखि भृकुटीमण्डपमा तिहारको महोत्सव, फूलको उत्सव’ भन्ने मुल नाराका साथ पाँच दिने तिहार विशेष फ्लोरा एक्स्पो सुरु भएको हो ।

आजदेखि जारी उक्त प्रदर्शनी १३ गतेसम्म सञ्चालन हुनेछ । मेलामा ६५ वटा व्यावसायिक स्टल लगायत वनस्पति विभाग, पुष्प विकास केन्द्र, सहितको अफिसियल ३ स्टल तथा प्रतिस्पर्धाको २ वटा स्टलसहित जम्मा ७० वटा स्टल रहेको आयोजकले जनाएको छ । करिब ३५ हजार मानिसले अवलोकन गर्ने अनुमान गरिएको मेलामा रु ७० लाखको फूल एवं नर्सरी सामानको बिक्री वितरण हुने समेत आयोजकले जनाइएको छ ।

मेलामा विभिन्न प्रजातीका फूल फुल्ने तथा नफुल्ने आलंकारीक फूल विरुवाहरु लगायत कृषि तथा वन, जडिबुट्टी नर्सरी, फलफूल नर्सरीबाट उत्पादित विविध प्रजातिका बोटविरुवाहरु प्रदर्शनी तथा बिक्रि वितरणको लागि राखिएको छ । साथै, मलखाद, अर्गानिक एवं रासायनिक विषादी, बिउबिजन, औजार उपकरण तथा प्रविधिहरुको समेत स्टल रहेको छ ।

एक्सपो अवलोकन गर्न सर्वसाधारणको लागि प्रवेश शुल्क प्रतिव्यक्ति रु. एक सय, विद्यार्थी र जेष्ठ नागरिकको लागि प्रतिव्यक्ति रु ५० रुपैयाँ तोकिएको छ ।