एमालेमा फर्किए मार्बुका परिचित नेता मिङमा, माओवादीमा धक्का

दोलखा । गौरीशंकर गाउँपालिका मार्बुका परिचित नेता मिङमा शेर्पा एमालेमै फर्किएका छन् । मंगलबार मार्बु वडाकमिटीद्धारा आयोजित चुनावी आमसभामा उम्मेदवारलाई जिताउने प्रतिबद्धतासहित शेर्पा एमालेमा फर्किएका हुन् ।

उनले गाउँपालिकाको उपनिर्वाचनमा एमाले उम्मेदवार उमा शेर्पालाई गाउँपालिका उपाध्यक्षमा जिताउन जरुरी रहेको भन्दै एमालेमा फर्किएको जानकारी दिए । उनका अनुसार आफु एमालेमा फर्किएपछि माओवादीमा ठुलो धक्का लाग्ने बताए । उनले एमालेमा फर्किएपछि भोलिदेखिनै उम्मेदवारलाई विजयी गराउन चुनाव प्रचारप्रसारमा लाग्ने बताए ।

गौरीशंकरको मार्बुमा नेता नामले परिचित मिङमा केहि समयअघिदेखि एमाले परित्याग गरी अन्यदलमा समाबेश भएको थियो । एमालेमा फर्किएका शेर्पालाई नेकपा एमालेका पोलिटव्युरो सदस्य एवं जिल्ला इन्चार्ज पार्वत गुरुङ र पोलिटव्युरो सदस्य आन्नद प्रसाद पोखरेलले स्वागत गर्नु भएको थियो ।

मतदानको लागि मंसिर १६ नजिकिदै गर्दा उपनिर्वाचनमा भागलिने उम्मेदवारहरु प्रचारप्रसारका लागि चुनावी माहोल तातेको छ । राजनैतिक दलहरु उम्मेदवार सहित घरदैलो अभियानमा मतदाताहरु भेट्न र चुनावी प्रचारप्रसार अभियानमा व्यस्त रहेका छन् ।

जिल्लाको एक मात्र स्थानीय तह गौरीशंकरको उपनिर्वाचनका लागि सात राजनैतिक दलसहित १६ जना उम्मेदवारहरु मतदाताहरुको टोल वस्तीमा पुगि मत माग्न व्यस्त रहेको छ । गौरीशंकर राजनीतिक प्रतिष्ठाको केन्द्र भएको हुदाँ उपनिर्वाचनमा तिव्र प्रतिस्पर्धा हुने देखिएको छ ।

जिल्लाकै उत्तरी क्षेत्र गौरीशंकर गाउँपालिका स्रोत साधनले सम्पन्न भएकाले नेकपा एमालेको नेतृत्व विना विकास सम्भव नभएको भन्दै घरदैलो अभियान तथा विभिन्न कार्यक्रममा युवा तथा शुभेच्छुकहरु एमाले प्रवेश गरी रहेका छन् । चुनावी अभियानका क्रममा विभिन्न पार्टी परित्याग गरी एमाले प्रवेश गर्ने युवाहरुलाई एमालेले स्वगत गरी रहेको छ ।

निर्वाचित जनप्रतिनिधीहरुको पछिल्लो कार्यशैलीका कारण अन्य दलसंग नागरिकहरु असन्तुष्ट बढदै गएको र नेकपा एमालेको नेतृत्व विना पालिकाको विकास संभव नभएको भन्दै एमालेप्रति युवाहरुको आकर्षण वढ्दै गएको निर्वाचन परिचालन समितीका संयोजक सोयम बहादुर खड्काले बताउनुभयो ।

त्यसैगरी, गौरीशंकर गाउँपालिकामा नेकपा एमालेको तर्फबाट उपाध्यक्ष पदको उम्मेदवार बन्नुभएकी उमा शेर्पा अहिले आफ्नो चुनावी प्रचार अभियानमा व्यस्त हुनुहुन्छ । गौरीशंकरमा यहि मंसिर १६ गते उपाध्यक्ष पदका लागि उपनिर्वाचन हुदैछ ।

भिडियो